يوميات طالبه بالمدينه الجامعيه

ازيكم يا احلى مجانين

طبعا كتير مننا قابلته مواقف زى العسل اثناء فترة دراسته واقامته بالمدينه الجامعيه....
بالنسبه ليا المواقف دى كانت بتجننى فحدث انه فى احدى المرات

كنت قاعده بالمدينه وكان تانى يوم عندى امتحان كيميا وفجأة واحدة من الاوضه اغمى عليها طبعا اختكم

عملت فيها د مجدى يعقوب وصرخت باعلى صوتى وسعولى

اديتها الاول قلمين محصلش حاجه قولت خلا ص نلجأ للحل الثانى وقولت اى حد يجيبلى اى شراب حالا وده كان ليه مفعول السحر اللى كان مغمى عليها فاقت شويه بس فى اتنين تانين داخوا من ريحه الشراب .....واحده قالت ياجماعه انا هنزل للمشرفه واخليها تتطلب الاسعاف علشان البنت كانت لسه تعبانه( الظاهر ان دى كانت الاثار الجانبيه للشراب)

المهم الاسعاف جات بعد ساعه كانت بتنقل حاله تانيه من المدينه برضه....
لقيت المشرفه بتقولى يالا طلعى صاحبتك الاسعاف ....بصيت حواليا قولتلها هى فين الاسعاف؟!:72_72 :
المشرفه: يابنتى سلامه نظرك قدامك اهه......
انا اللى لقيته عربيه متنفعش حتى تشتغل سرفيس اول ما طلعت فيها لقيت مقعدين خشب على شكل زاويه قائمه...ومش عارفه اقعد ولا حتى اقعد صاحبتى اللى كان اغمى عليها تانى....
واول مالعربيه مشيت لقيت بابها مفتوح (يادى اليله اللى مش هتعدى)
ياعم باب العربيه مفتوح لوسمحت استنى ..لقيته بيقوللى معلش يا ابله اصله مبيتقفلش(نعم مبيتقفلش
يعنى ايه يعنى بدل متروح واحده المستشفى هنروح احنا الاتنين)

الحمد لله بعد معاناه وصلنا المستشفى وبعد مده جات دكتوره امتياز اول ما دخلت قالت ركبولها محلول...المهم جات الممرضه وركبت المحلول ...وقالتلى اول مايخلص خديها وروحى....
لسه الممرضه طالعه من الاوضه....لقيت حاله داخله علينا عرفت بعدها ان مرات عم البنت دى رمتها من الدور التالت...وفجأه ظهر واحد وراها مجبس ذراعه وقاعد يقول ان حقنا ناخده بدراعنا
(لا مهو واضح)
انا ساعتها لقيت كل اللى كان فى الاوضه هرب حتى صاحبتى اللى كانت شبه ميته فاقت....
وبعدها حصلت حاجات ليها العجب...دخل دكتوروطرد الناس دى بره وكشف على المريضه لقى عندها كسر فى رجليها بس ..وبعدها قال ركبولها محلول....دخل بعده دكتور تانى رفع رجل البنت دى وعمل لها حركات ثنى وفردوالبنت عماله تصرخ وقالها انتى عندك كسر ....بعدها دخل دكتور تانى عمل بالظبط زى الاولانى وقال نفس الكلام....بعد شويه دخل دكتور تانى ولسه هيعمل زى اللى قبله قولت ارحم البنت دى قبل ميعمل الدكتور ده زى اللى قبله ويخلى الكسر بدل ماهو عادى يخليه كسر مضاعف ولسه بقوله على اللى حصل لقيت عسكرى داخل علينا ووراة الباشا
انا ساعتها شيلت المحلول من صاحبتى وقولتها كفايه كده عليكى (دانا كده عشت ليله عمرى ماحلمت بيها .

احلى مافى الموضوع اننا واحنا طالعين ادور على المشرفه مش لقياها خالص وبعد عذاب لقيناها
واحنا ماشين الدكتورة اللى كانت كشفت على صاحبتى اديتنى ورقه فيها اسم نوع من الحبوب قاليتلى روحى اصرفيه فقولتلها بس صاحبتى ما بتخدش حبوب ممكن حقن ....لقيت الدكتوره قالتلى هو ده الموجود
لقيت المشرفه بتقولى النظام هنا السبت والاتنين والربعاء حبوب والاحد والثلاثاء والخميس حقن
(الشاطر بقى يقولى يوم الجمعه نظامه ايه
وليه جايزه عندى