مرايا - حرامى الرغيف - التضليل

للشاعر : على سلامة
بيغنيها المطرب وجيه عزيز على العود

مــــــــــــــــــرايا
قلت أبص ف المرايا ..
يمكن أكون إحلويت ..
فضلت داير أبص ..
مخلتش ولا مرايا ف البيت ..
في الحمام ف الأودة ف دولاب ..
أو متعلقة ع الحيط ..
شوفت ..
سكت شويه ..
وبعدين إتخضيت ..
معقول أنا قضيت العمر ده كله ..
وزي ما روحت زي ما جيت ..
معقول أنا عمري مافكرت ولا إتغيرت ولا حبيت ..
وإزاي ساكت علي روحي ده كله ..
وليه إستنيت ... !
يا ريتني ما كان عندي مرايا ..
وياريتني ما بصيت ..

حرامى الرغيف للشاعر : بيرم التونسى

حرامى الرغيـف
تسرق رغيف يا حرامى وتنحبس شهرين
لو كنت قاضى المدينة لأحبسك سنتين
لأن ذنبك يا مجرم يعتبر ذنبيـــن
* * *
المهنــة رخصتها لما ســرقت رغـــيف
وسرقت من قبل ما تصبح وجيه وشريف
لا أنت حرامى تشرفنا ولا أنت وجيه
ويا ويله يا متعسة الواقف ما بين بينيـن
* * *
تهجم على السرقة ليه يا أجهل الجهــال
رئيس قلم حضــرتك ولا مــدير أعمـــال
السرقة يا بن الحلال صنعة وعايزة رجال
لهم فى فض المشــاكل والأمـور تصريف
ومن وراهم ضهور جامدة وجنـس لطيف
يهونوا إللـي جــرى ويلطفــوه تلطـــيف
وفــين تــروح بالرغيف جنب الأكابر فين
* * *
أصـبر على نعمتـك يمكـن هتبقى وجيــه
وجيـه بمكـتب وسـاعي بالجـرس تناديــه
وسكــرتير زى حالـي لما تشــخط فيــــه
تتــزلزل الأرض والعالـم يقـول يا لطــيف
والبنكـنوت يتحشى لك حشـو فى مظاريف
تلقاها بالصدفـة فى جيبــك بــدون تكــليف
وتقـول عجيبــة يارب الظرف جانى منيـن

التضليل للشاعر : أحمد فؤاد نجم (الفاجومى)

التضليل
دا شيعة
واحنا سُنه
دا فين ومصر فين!
عايزين يدخلونا
نظام ودنك منين
وناس تقول شيوعى
وعامل نفسه شيعى
عشان خيفين طبيعى
ليبقوا ثورتين
يا أسيادنا اللصوص
قرينا ف النصوص
لو الإنسان يلوص
يغوروا الفرقتين
وشُفنا ف الكتاب
لقينا الدين حساب
وثورة وانتساب
وعين تساوى عين
سرقتوا الثورة منا
وقلتوا الصبر مِنه
وعُقب الصبر جنة
وباب بمفتاحين
ودان المُلك ليكو
وشاع الكُفر فيكو
وزاد الفجر بيكو
عملتوا إسلامين
وكفرتوا الإمام
وطفشتوا الحمام
خلاصة الكلام ...
يزيد ولا الحسين!