للشاعر الكبيرأحمد فؤاد نجم
بعنوان " الخط ده خطي "
الخط ده خطّي
الخط ده خطّي .. و الكلمة دي ليَّ
غطّي الورق غطّي .. بالدمع يا عينيّ
شط الزتون شطّي .. و الأرض عربية
نسايمها أنفاسي .. و ترابها من ناسي
و إن كنت أنا ناسي .. ما حتنسانيش هيّ
الخط ده خطّي .. و الكلمة دي ليَّ
لاكتب على عيني .. يحرم عليكي النوم
و احبس ضيا عيني .. بدموعي طول اليوم
قبل الوفا بديني .. زَي الصلا و الصوم
ده الدين في عُرف الحر .. هم و مذلة و مر
و هموم تجيب و تجُر .. أحزان مخبِيَّة
لاكتب على كفي .. و الحبر من دمي
يا عِزوتي كفي .. يا همتي ضمي
أول ما حنوَفي .. بالوعد حنسمّي
باسم اللي ماتوا صغار .. في المدرسة و الدار
و المصنع اللي انهار .. فوق الصنايعية
الخط ده خطي .. و الكلمة دي ليَّ
موضوع: الخط دة خطى 
الأربعاء أغسطس 20, 2008 5:02 pm
