خلاصه القول في طب الأسرة

بصوا بقه يار رجاله
انا سألت اليومين الي فاتوا دول بتاع اكتر من 20 واحد و جمعت اكبر قدر من المعلومات عن طب الأسرة و هاقولكم كل الي عرفته و كل واحد يقولي رأيه

أولا : التخصص ده زي ما كل الناس عارفه لسه جديد ومش متطبق في مصر بسشكل واقعي الا في بعض وحدات ريفيه لكن ( وناخد بالنا اوي من كلمة لكن دي ) الي شغالين في الوحدات الريفيه دي مش اطباء أسره دول دكاتره تكليف عاديين الي هم الناس الكبار الي خدوا البكالوريوس وكبروا دماغهم على كده في التكليف ومش حضروا اي حاجه و كملوا حياتهم كده في التكليف و خلاص فدول الي ماسكين طب الاسره حاليا لان اصلا مفيش لسه حد اتخصص طب اسره في مصر
انما النظام ده هيتطبق في مصر كليا من سنه 2012 او 2014 بشكل كامل في المدن و الريف و كل الاماكن يعني مش شرط انك هتشتغل في وحده ريفيه و لا حاجه , هاتقولي ياااااه لسه 2012 او 2014 هاقولك شوف انت اصلا هتخلص نيابتك امتى و لسه ال 6 شهور بتاع مساعد الاخصائي يعمي مش هتخلص قبل 2012 اصلا و دي ميزة اننا هنكون اول ناس تتعين و طبعا الاوائل في الموضوع يكون لهم الاولويه في كل شيء و انتوا عارفين كده كويس , و غير كده ان مرتب الحكومه هيكون عالي جدا و الشغل مريح جدا يعني اخره اوي لحد الساعه 2 الظهر و بعد كده انت حر في يومك تفتح عيادتك و تعيش حياتك ز هتقولي هفتح عياده ايه ؟ هاقولك انت اولا من حقك تفتح عياده و تكتب عليها باطني و أطفال او تكتب مثلا دكتور فلان باطني أخصائي طب الأسره او اطفال زي ما انت عاوز و محدش عارف حاجه و خصوصا اذا كنت فاتح في منطقه شعبيه و اعتقد ان معظمنا لو مكنش كلنا لازم يفتح عيادته في منطقه شعبيه اذ من غير المعقوا ان تبقى لسه في اول الطريق و تفتح في مصر الجديده مثلا حتى لو انت مدرس في الجامعه يعني مفيش مشكله . طيب عاوز حل اسهل بكتير ؟ هاقولك حل سهل خالص أضرب شهاده طبيب حر و سجل دبلومه أطفال دبلومه مش ماستر وخدها براحتك في فترة النيابه و لما تخلص و تفتح عياده اكتب عليها أخصائي أطفال بالبنط العريض و لا حد هايقولك ربع كلمه ومحدش يقولي دبلومه اطفال صعبه و خصوصا لو كانت في جامعه على ما تفرج و شغل الاطفال مش صعب و خصوصا انك هتشتغله كويس في النيابه مش هيفضلك غير النيونيت و ده انت مش محتاجه في عيادتكاما بقه الي خايف من انه يفضل في وحده ريفيه فده مش هيحصل لان زي ما قولنا انك اول ما هتخلص هيكون اتطبق في مصر كلها و هتشتغل في اي مكان و حتى لو وحده او العفريت حتى متنساش انك أخصائي و هتبقه المدير يعني الحضور و الانصراف ده بمزاجك تروح متروحش هتتزبط و اذا كان التكليف بيتزبط وانت عندك مدير غلس فما بالك بقه و انت المدير نفسه و بعدين مرتبها حلو اوي ولو قفلت معاك أجازه و اتفرغ لعيادتك و للبرايفيت

ثانيا بقه و هو ده المهم جداااااااااااااااا
احنا كل ده بنتكلم و انت في مصر و طب الاسره اصلا مش عشان مصر
دلوقتي السعوديه و الخليج مطبيق طب الاسره كويس اوي
و عاوزين اطباء اسره باعداد رهيبه لدرجه انهم بياخدوا اي جي بي لمجرد انه قضى سنه في مركز طب اسره او اكتر و كمان بيعملوا دورات طب اسرة الي كلنا عارفنها و دي اسمها دورات يعني لا ماجيستر و لا حتى دبلومه و بيسافروا علطول و بمرتبات خياليه يعني تخيل الجي بي بيسافر ب من 3,500 الى 4000 و دول بيسافروا على الاقل ب 5000 فما بالك بقه لو معاك ماستر انا ناس قالولي ان السفر بتاع الماستر بتاع طب الاسره ب 13000 وطبعا دا اول سفرك و بعد كده هتزيد غير ان اقامتك و اكلك و شربك وكل حاجه انت ومراتك عليهم يعني دخل ممتاز و كمان الشغل مريح جدا اقصاه 8 ساعات و سمعت كمان انهم 6 ساعات بس و شغل مريح اوي حتى في اثناء ساعات العمل و باقي اليوم فاضي هتقدر تستغله كويس اوي , هتقولي هاعمل فيه اي يعني هاقولك تعمل كتير اوي ابسط حاجه ممكن تعملها تخيل ايه ؟ زماله بريطانيه اطفال او باطني الوقت موجود للمذاكره الفلوس موجوده عشان الكتب و الامتحانات و كل حاجه و التعليم برده في شغلك لان شغلك معظمه باطني و اطفال و كده يبقه بعد كم سنه لو مش عاجبك طب الاسره اشتغل التخصص الي يعجبك بالزماله البريطانيه
هتقولي ولما ارجع مصر هاعمل ايه ؟
هاقولك و ايه الي هيرجعك اصلا , مرتب زي الفل و بلد زي الفل عاوز ترجع ليه ؟!!!!
و عموما يا عم لو رجعت ما انت معاك على الاقل دبلومه الاطفال الي اخدتها من قبل ما تسافر ارجع افتح عياده بقه زي ما قولنا جنب شغلك الصبح بتاع الحكومه
وممكن كمان تكون اخدت الزماله البريطانيه و ترجع تشتغل استشاري باطني او اطفال


دا رأيي و خلاصه الكلام الي سمعته ياريت تقولولي ايه رأيكم